كل الأجوبة عن طائر البلبل

السلام عليكم

يمكن صار لي اكثر من سنتين وانا اتابع طير البلبل من معلومات ومواضيع وكل الطرق
اكتسبرت خبره من اشخاص لهم مستوى كبير في هذا المجال .. وبالاخص البكستانيين
لهم طرق عجيبه في التدريب وتكاثر

اول لكي تربي بلابل او تتاجر فيهم .. يجب ان تكون لديك راس مال جيد
مثل ما انت تبي منهم هم بعد يبون منك ...

اول تدريب البلبل ...؟
في الف طريقه وطريقه
حتى لو كان كبير بالعمر يتدرب ويصير احسن من لصغير

في الطريقه الشائعه عن البكستانيين ..اشتر لك من محل الالعاب مجسم على صورة يد انسان
وحطه له داخل القفص وشيل الاستاند .. يعني اجباري راح يوقف على مجسم اليد
وباليوم حركها اكثر من مكان .. وحط الاكل عليها وراح ياكل ... ومجربه معاي
100% اول شي يخاف بعدين راح يتعود عليها ..

هذي الطريقه توني تذكرتها وحبيت افيدكم فيها
روح لك مكان داخل بيتكم مطبخ تحضيري صغير يكون فاضي او ما شابه وشيل الاغراض الي فيه كلها
يعني مافي شي الى الطوف والارض وانته واهوى .. يعني اذا طار ما يوقف الى
عليك بس من كثرت التعب والطيران راح يوقف عليك بس لازم اتجوعه على شان ياكل
من ايدك

في طريقه ثانيه انا اعترف فيها بس مجربها وصحيحه 90% تنتيف الطير ولا تضعه
داخل القفص مدت اسبوعين على الاقل .. وخله كله على يدك طبعا راح يوقف
قصبن عليه اذا نتفته ريشه كله وراح ياكل من ايدك بنفس الدقيقه ....انا من
ناحيتي اعطيه للخدم يخلونه على ايدهم ويفترون فيه ..[ندعوك للتسجيل في المنتدى أو التعريف بنفسك لمعاينة هذه الصورة]
بس لا تحاول تعديه للقفص الى بعد اسبوعين ناس تقول اذا بنام وين احطه
طبعاً لازم يكون عندك قرفه فاضيه ومافيها شي بس استاند يوقف عليه .. وحاول
اذا حطيته على ايدك افتر فيه داخل البيت وخل يشوف الاهل وقعد معاهم وانته
حاطه على ايدك ..ولا ياكل الى من ايدك ..

في طريقه الي يقولك شيل الاكل عنه وخله ياكل بس من ايدك جوعه .. هذي
الطريقه انا نهائياً ما اعترف فيها .. شنو فايدة الطير الي ياكل من ايدك
واول ما ادخل ايدك ينحاش حلاة الطير تفتح له الباب يطير ويوقف عليك بس على
قولتهم شي من ولاشي ..^_^

في اشياء لازم تسويها وانت تدربه
1. تصفر له تصفيره وحده ولا تغيرها ...
2. تحرك اصابيعك في ويها .....هذي مهمه
3. حك تحت منقاره صوب الرقبه من فوق البطن .. هذي مهمه جداً وراح يحبها
الطير وكل ما يشوفك يرفع راسه على شان تحكه له يرتاح من هذا المكان طبعاً
يعض بالاول بعدين راح يتكر العض
4. لازم انك تشيل الاكل عنه وما ياكل الى منك
5. لا تخليه يشوف طير ثاني مهمى يكون خله بروحه ..
حاول اكثر شي توقفه فوق راسك يحب منطقة الشعر .

* بنسبة للتكاثر ..؟

لازم يكون محمية او السلاكه ارتافع 3 امتار اواكثر اطول اقل شي 5 امتار والعرض 3 امتار
واذا على المحميه مالتي .. 3ونص ارتفاح الطول 11 متر العرض 6 .. بس يا شباب
اهم من المحميه داخلها .. لازم تكون اشياء وزينه لدرجة خمس نجوم .. انا
مسوي شلال ماي للسباحه .. حاط نخله بنص حاط شجرتين حاط شجره كبيره ميته
للتعشيش مسوي لهم حوض في تراب البحر من قواقع وكلس وغيره ..كل مكان حاط
اسعاف النخل واهم شي ليف النخل تضعه بكثره للتعشيش اهم مافيه لازم تكون
المحميه مضرب شمس يومي .. للصيف تكييف ماي كبير او صغير على حسب حجم
المحميه ..

وبنسبة الي عندهم جوز واحد .. ويقول يتهاوشون مع بعض .. حطهم في قفص كبير
اشويه مترين في مترين في مترين .. ومدة اسبوع راح تشوفهم مع بعض وتقدر
تحطهم في قفص الي تبيه بدون عراك وهواش .

وبنسبة لشكل المحميه ومكانها لازم يكون بعيد بعد نهائياً عن الازعاج يفضل فوق سطح البيت
كثرت الاقسان وحاول تخلي شكل المحميه بحرف الثمانيه ^ او مايل لفصل الشتاء والامطار

حاول ان تضع الطيور الي حجمها كبير فقط لي انتاج صحيح وتحس انك تعبان على شي وليما تفرخ يطلع الفرخ حجمه كبير في المستقبل

طبعاً الانثى تبيض من 2 لي 3 بيضات وعند التفريخ حاول انك تنوع لفروخ الي
طلع له فرخ واحد شيل من هذاك وحطه في العض الثاني .. لي انه دائما الفرخ
الثالث يموت مدة اسبوعين طلع الفرخ من عشه وانته وكله او نفس طريقتي قاعد
ابيع منهم

فترت انتاج البيض من شهر 6 و 7و 8 و 9

التفرقه بين الذكر والانثى صعب صعب صعب جداً الفرق المعروف انه صوت الانثى اخف من الذكر

ولا تحاول انك تمسك طير نهائياً واهوى في المحميه ولا تحاول انك تدخل داخل
القفص وبالنسبه للكل عطهم من خارج القفص سو لك سحاب وضع الاكل فيه

بالانسبه للكل وتقوية الخصوبه للانتاج ..
في اكل للكناري بيض وعسل لون العلبه اخضر ........يومين في الاسبوع
خبز مع ماي ...... ثلاث ايام بالاسبوع
كل انواع الفواكه .....يومين بالاسبوع
الخضره ....... يوم واحد بالاسبوع
في انواع من الكلس هذا مفيد جداً ... يومي او 5 ايام بالاسبوع
واهم شي البيض المسلوق ... يوم واحد بالاسبوع
وطبعاً التمر يومياً
ولي تمتع الطير بصحه قوية الاكل الزايد شيله وغسل الاناء الاكل جيداً
الماي يومياً تبديل ..

شباب لا تنسون ان تضعو الفخوخ حول المحيه لصير الطيور الاخرى .. بس لا
تحطه على طول معاهم خله بروحه مدة اسبوع بعدين حطه للتأكد من صحته ولا ينقل
لهم مرض ..

كان ودي ادعم الموضوع بالصور .. قريباً جدأ

بنسبة عندي يمكن 80 جوز .. انتاج هالسنه 40 فرخ .. كان الانتاج اكثر بس بسبب الاهمال ماتو وايد

وصار اعتمادي كله على الخدم لكثرة اشغالي خارج المنزل

وبنهاية
الي عنده اي سؤال انا حاضر من ناحية التدريب او التكاثر او التربية او اي شي
والي راح اقدر عليه راح افيده ان شاءالله ..